Brasil, Mexico e le Republica Democratic del Congo es, per iste ordine, le paises de lingua official romanic le plus populate in le mundo. Il es interessante notar que, ben que le majoritate del linguas latin es parlate in Europa, le majoritate del parlatores romanic se trova in le continente american. Isto es debite al facto que, in le seculos XIX e XX, paises american ha devenite un importante centro de migration e crescimento demographic.
Le lingua official de Brasil es le portugese, parlate per circa 210 milliones de personas. Mexico, de su latere, ha le espaniol como lingua official, e illo es parlate per plus de 130 milliones de personas. Finalmente, le Republica Democratic del Congo ha le francese como lingua official, que es parlate per circa 50 milliones de personas. In iste pais, mesmo si le francese es lingua franca e lingua de scholarisation, un parte importante del population non cognosce ben ancora iste lingua.
Il es importante signalar que, mesmo si le majoritate del parlatores romanic se trova in America, linguas romanic continua a esser importante in Europa. Post toto, le majoritate del linguas romanic es ancora parlate in Europa e paises como Francia, Italia, Romania e Espania ha grande populationes de parlatores romanic. De facto, quasi 50% del population del Union Europee ha un linhua romanic como lingua native e circa 209 milliones de personas in iste continente parla espaniol, francese, italiano, portugese e multe altere linguas a nivello national, regional e mesmo local. Toto isto explica que linguas romanic ha un peso importante in le cultura e economia europee.
Nonobstante, il es importante comprender que le uso del linguas romanic non es limitate a un sol continente e illos es vermente un parte importante del mundo. Infortunatemente, multe personas, specialmente in paises latin europee, tende a pensar ancora hodie que le parlatores romanic es principalmente europee o de origine europee. Dissociar le identitate europee o le “blanquitude” del linguas e culturas romanic es crucial, proque isto permitte haber un comprension plus complete e accurate del uso e del rolo del linguas romanic in le mundo. In le mundo globalisate de hodie, il deveni essential haber un comprension plus global del realitate del linguas romanic e non focalisar nostre perspectiva in un certe lingua, area o gruppo de personas. Ab iste puncto de vista, e in le contexto actual, il serea multo positive pro le varie communitates de lingua romanic recuperar ille concepto de latinitate, promovite per annos per le infelicemente extincte Union Latin, superpassante sempre le visiones classic e eurocentric. E face a iste necessitate, un question surge inevitabilemente: qual institution poterea assumer hodie iste labor?